Skal vi lykkast med digital transformasjon, må vi få med oss diamantane i organisasjonen

Å lykkast med digital transformasjon krev menneske, leiing og nye arbeidsformer

DigiVestland har nå gjennomført pulje to i kompetanseløftet i digital transformasjon, med DI2X-rammeverket som kompass. Også denne gongen trefte samlinga midt i leiarkvardagen. Deltakarane reiste heim med ny energi, nye perspektiv og ein god porsjon konstruktiv uro, den typen uro som set i gang refleksjon, diskusjon og lyst til handling.

For fleire vart det tydeleg at tida for å venta er forbi. Siril Therese Sylta, tenesteleiar i Alver kommune, oppsummerte opplevinga med at ho etter samlinga sat att med «ein motivasjon til å vera meir aktiv og faktisk ta tak i moglegheitene den digitale utviklinga gir – både for å skapa gode tenester og attraktive arbeidsplassar i eigen kommune».

Det var heller ikkje mangel på sterke stemmer frå scena. Eirin Folde frå DI2X, Sidsel Nordhagenfrå KS Digital, Kjetil Århus frå Bergen og Askøy kommune, Silvija Seres, Julie Johansen frå Nesodden kommune, Bjarte Bogsnes, HR-direktør Asgjerd Eidefrå Haraldsplass diakonale sjukehus og endringsagentane Charlotte Kaldager og Kristin Harvey frå Bærum kommune gav deltakarane både innsikt, attkjenning og konkrete døme på kva digital transformasjon faktisk krev i praksis.

Felles for innlegga var at dei trefte rett inn i ei verkelegheit mange kjenner godt: Ambisjonane er høge, men arbeidsformene heng ikkje alltid med. Bodskapet var tydeleg: Skal vi lykkast, held det ikkje å digitalisera det gamle. Vi må òg endra korleis vi samarbeider, prioriterer, lærer og leier.

Asgjerd Eide sette ord på noko mange nikka gjenkjennande til då ho delte erfaringar frå store omstillingsprosessar ved Haraldsplass: Skal endring faktisk skje i praksis, må vi få med oss “diamantane” i organisasjonen – dei som påverkar arbeidskvardagen og får nye arbeidsmåtar til å leva. Ho løfta særleg fram mellomleiarar og tillitsvalde som nøkkelpersonar for å skapa tryggleik, eigarskap og framdrift.

Meir handlingsrom gjennom nye styringsmodellar

Bjarte Bogsnes utfordra tradisjonelle styringsmodellar og skapte stort engasjement rundt korleis beyond budgeting og digitalisering kan gi meir handlingsrom og betre utviklingskraft. Erfaringane frå Bærum viste samstundes at tverrfaglege og smidige team ikkje berre er noko vi snakkar om, men noko som faktisk kan byggjast og gi resultat.

KI støtta sakshandsaming

Eit av innlegga som verkeleg vekte merksemd, kom frå Julie Bye Johansen i Nesodden kommune. Ho fortalde om heildigitale søknadsløysingar med bruk av kunstig intelligens. Pipesøknader går nå heilautomatisk, medan meir kompliserte plansøknader får teknologistøtte der det er mogleg, samtidig som behandlar framleis utøvar nødvendig skjøn.

For fleire deltakarar var dette eit godt døme på korleis digitale grep kan gi både betre kvalitet og meir effektiv ressursbruk. Kommunedirektør i Bømlo kommune peika på verdien av nettopp denne kombinasjonen av perspektiv, og trekte fram at samlinga «foreinar dei store linjene med konkrete døme frå kommunekvardagen», og at presentasjonen frå Nesodden var særleg nyttig.

At ein kommune med 20 000 innbyggjarar nå tar i bruk heilautomatisk, KI-støtta saksbehandling, viser kor raskt sjølve arta til arbeidet er i endring. Løysinga er dessutan skalerbar og skal prøvast ut òg på andre saksområde, som NAV og barnevern.

Responsen lét ikkje venta på seg. Ein begeistra kommunedirektør samanfatta det slik: «Endeleg får vi opp dei gode døma innanfor plan, bygg og geo.»

Vegen vidare for kompetanseløftet

Samlinga skapte ikkje berre refleksjon, men også tydeleg interesse for kva som bør skje vidare. Det blir nå kartlagt om det er grunnlag for å gjennomføra eit train-the-trainer-kurs i juni. Målet er å byggja endå sterkare endringskraft i kommunane. Erfaringane frå samlinga peikar samstundes på verdien av å samla ein brei miks av leiarar, tillitsvalde og tilsette som står tett på dei daglege problemstillingane.

7. mai er det planlagt ei erfaringsdelingsmøte med Sogndal kommune der dei fortel korleis dei tenkjer rundt nytt om budsjettarbeid, med moglegheit for å stilla spørsmål og diskutera vegen vidare saman.

For kommunar som ennå ikkje har vore med på kompetanseløftet samla sett, blir samlinga i haust siste moglegheit. Vi har allereie byrja å få påmeldingar, men det er framleis nokre kommunar som står att. Nå gjeld det å gripa moglegheita.

Ønskjer du å vera med når det faktisk byrjar å bevega seg, er dette ein god stad å starta. Meir informasjon om kurset og påmelding finn du her. Åpnes i nytt vindu.