Digitalisering for alle: Ullensvang og Bergen kommune tar grep mot utanforskap

Digitalisering av offentlege tenester gjer kvardagen enklare for mange, men skaper samstundes utfordringar for innbyggjarar som manglar digital kompetanse eller tilgang til rettleiing. Fleire kommunar arbeider no målretta for å hindre digitalt utanforskap gjennom lågterskeltilbod, samarbeid på tvers av sektorar og meir strukturert digital rettleiing. Ullensvang og Bergen kommune er to av kommunane som har fått tildelt tilskot frå Digdir til etablering av kommunale opplæringstilbod i digital kompetanse.

Ullensvang kommune etablerer eit permanent rettleiingstilbod for velferdsteknologi og MittAidn

Ullensvang kommune har fått tilskot for å etablere eit permanent, lågterskel rettleiingstilbod for alle aldersgrupper, med særleg fokus på bruk av velferdsteknologi og kommunikasjonsløysinga MittAidn. Bakgrunnen er aukande etterspurnad etter digitale helseløysingar som tryggingsalarmar, digitale låsar, elektronisk medisineringsstøtte, tråkkematter og digitale kommunikasjonsverktøy.

Kommunen ser at mange innbyggjarar, særleg eldre, pårørande og personar med avgrensa digital kompetanse, har utfordringar med å forstå og ta i bruk desse løysingane. Mangelen på eit varig og strukturert rettleiingstilbod fører til risiko for digitalt utanforskap, redusert tryggleik og svekt eigenmeistring. Samstundes nyttar helse- og omsorgstenestene mykje tid på teknisk støtte og repetert opplæring.

Prosjektet er eit samarbeid mellom sektor helse og omsorg og frivilligsentralane i Ullensvang kommune. Det skal etablerast eit fast, bemanna rettleiingstilbod som er både fysisk og digitalt tilgjengeleg, med opningstid minimum éin dag i veka. Målet er at minst 300 innbyggjarar skal få individuell eller gruppebasert rettleiing i løpet av det første driftsåret, og at minst 80 prosent av brukarar med installert velferdsteknologi skal ha fått opplæring innan seks månader etter oppstart.

Tilbodet byggjer vidare på tidlegare erfaringar, men representerer eit nybrottsarbeid ved å vere varig, spesialisert og teknologispesifikt. Rettleiinga skal vere praktisk, temabasert og tilpassa den enkelte, med samhandling mellom innbyggjarar, pårørande og helsepersonell. Prosjektet hadde oppstart i januar 2026, og målet er at tilbodet skal bli ein del av ordinær drift. Erfaringane skal delast med andre kommunar gjennom Digihjelpen-nettverket Lenke til et annet nettsted. og regionale fagforum.

Ønskjer du å høyre meir om prosjektet, ta kontakt med Elin Myran i Ullensvang kommune: elin.myran@ullensvang.kommune.no

Digidagane i Bergen samlar fleire tenester på eitt sted for praktisk rettleiing

Prosjektet «Digidagane» har som mål å styrkje digital inkludering gjennom samarbeid mellom fleire offentlege aktørar. Tiltaket er forankra i leiinga i Bergen kommune og byggjer på erfaringar frå digital rettleiing ved Innbyggerservice sidan 2017, i tillegg til deltaking i Digihjelpen-prosjektet.

Hovudideen er å samle ulike offentlege aktørar på same stad og tilby opne arrangement der innbyggjarar kan få praktisk og tilpassa rettleiing i bruk av digitale offentlege tenester. Arrangementa er planlagde gjennomførte hos Bergen Offentlege Bibliotek i Bergen kommune, ein sentral og universelt utforma møteplass som allereie har høg trafikk av innbyggjarar som søkjer digital hjelp.

Prosjektet samlar aktørar som Nav, Vestland fylkeskommune, Helse Bergen, BIR, KS Digital, Etat for bibliotek og kultur, Bymiljøetaten og Innbyggerservice. Målet er at innbyggjarane skal kunne få hjelp til reelle og kvardagslege digitale utfordringar i møte med offentlege tenester – på eitt og same sted. Etter det kommunen kjenner til, er dette ikkje gjort tidlegare i ein stor kommune.

Prosjektet har ei tredelt målsetting:

1. Auke innbyggjarane si digitale tryggleik og kompetanse
2. Sikre reell brukarmedverknad i digitale tenester gjennom dialog og observasjon, og styrkje samarbeid og heilskapstenking på tvers av offentlege aktørar.
3. Samstundes skal prosjektet vere ei læringsarena for dei tilsette som gir digital rettleiing.

Målgruppa er alle innbyggjarar i Bergen kommune som synes det er utfordrande å bruke digitale tenester i sin kvardag eller er nyfikne på dei nye digitale tenestene. Det er også eit mål at pårørande og andre støttespelarar skal kjenne seg velkomne.

Bergen kommune håper på å kunne gi digital rettleiing til om lag 1000 innbyggjarar gjennom Digidagane. Prosjektet skal dokumenterast og evaluerast med mål om å utvikle ein berekraftig modell for tverrsektorielt samarbeid om digital inkludering, i samarbeid med KS Digital, som også kan takast i bruk av andre kommunar.

Vil du høyre meir om Digidagane, ta kontakt med Eva Hille i Bergen kommune: eva.hille@bergen.kommune.no

Felles utfordringar – ulike modellar

Tiltaka i Ullensvang og Bergen viser to ulike tilnærmingar til same utfordring: behovet for å styrkje digital meistring, tryggleik og deltaking i møte med stadig meir digitaliserte offentlege tenester. Medan Ullensvang legg vekt på eit varig, lokalt forankra rettleiingstilbod knytt til velferdsteknologi og Mitt Aidn, utviklar Bergen ein modell for breitt samarbeid og samordna rettleiing på tvers av sektorar.

Begge prosjekta peikar på kor viktig det er med lågterskeltilbod, praktisk rettleiing og samarbeid for å hindre digitalt utanforskap – og gode døme på tiltak som andre kommunar kan la seg inspirere av i arbeidet med digital inkludering.