KI-lova kjem: Dette bør kommunane vite no

Kvifor er dette relevant for kommunane?

For dei fleste kommunar vil den viktigaste rolla vere som «idriftsettar». Det betyr at kommunen tek i bruk KI-system i eiga verksemd, til dømes gjennom innkjøpte løysingar eller digitale verktøy som inneheld KI. Kommunen vil då ha ansvar for at systema blir brukte på ein trygg måte og i tråd med krava i regelverket.

Eit risikobasert regelverk

KI-forordninga byggjer på eit risikobasert prinsipp. Krava blir strengare jo større risiko eit KI-system kan ha for menneske, grunnleggjande rettar eller sikkerheit.

Nokre former for KI blir forbodne. For såkalla høgrisiko-KI kjem det strengare krav til mellom anna testing, dokumentasjon, logging og menneskeleg tilsyn.

For kommunesektoren er det særleg relevant at KI-system innan område som utdanning kan falle inn under kategorien høgrisiko. Regelverket omfattar òg KI-system som blir brukte på andre særleg kritiske område.

For KI-system med avgrensa risiko kjem det krav om openheit. Brukarane skal mellom anna få vite når dei kommuniserer med eller blir påverka av eit KI-system.

Kva bør kommunane gjere no?

Sjølv om det ikkje er fastsett når KI-lova skal gjelde i Noreg, anbefaler Nasjonal kommunikasjonsmyndigheit (Nkom) at verksemder startar førebuingane no. Det første ein bør gjere er å anbefale alle sine ansatte til å ta DigiVestland sitt Grunnkurs i KI kor den ansatte får akkurat den opplæringa som krevst i den nye KI-forordninga.

Eit viktig neste steg er å kartleggje korleis kommunen brukar kunstig intelligens, vurdere kva risikokategori dei ulike løysingane høyrer til, og få oversikt over kva plikter som kan gjelde.

Kommunar som vurderer å ta i bruk nye KI-løysingar, eller som allereie nyttar slike verktøy, bør derfor følgje utviklinga av regelverket tett.

Kva skjer vidare?

Regjeringa arbeider med å innlemme KI-forordninga i EØS-avtalen og gjennomføre regelverket i norsk rett. Etter at EU vedtok fleire endringar i KI-forordninga sommaren 2026, har regjeringa varsla at den norske KI-lova skal ut på ny høyring hausten 2026. Ambisjonen er å leggje fram lova for Stortinget våren 2027.

Endringane frå EU inneber òg at reglane for høgrisiko-KI blir utsette til 2027 eller 2028, avhengig av kva type system det gjeld. Målet er å gi verksemdene betre tid til å førebu seg og få tilgang til standardar og rettleiing før krava trer i kraft.

Les meir på regjeringa si nettside Lenke til et annet nettsted, åpnes i nytt vindu. og KI Norge Lenke til et annet nettsted, åpnes i nytt vindu.