Samarbeid om digitalisering i Vestland- status

Bakgrunnen: Behov for å samla kommunane - igjen

Arbeidet spring ut frå ei utfordring som har prega samarbeidet om digitalisering i Vestland dei siste åra. Fram til sommaren 2025 var kommunane samla i DigiVestland. Då ny samarbeidsavtale skulle inngåast, valde 27 kommunar å stå utanfor, medan 15 kommunar gjekk vidare i samarbeidet. Dermed stod Vestland utan eit fylkesdekkande digitaliseringsnettverk.

Dette har skapt ei utfordring når kommunane skal samarbeide om innføring av nasjonale løysingar, representere fylket i nasjonale digitaliseringsfora og dele kompetanse på tvers av kommunegrenser. Kommunedirektørutvalet har derfor arbeidd med å finne ein modell som kan samle kommunane om felles prioriteringar og sikre betre koordinering av digitaliseringsarbeidet i fylket.

Bakgrunnen er også at kommunesektoren står overfor store krav til digital omstilling, samtidig som ressursane blir knappare. For å lykkast med å ta i bruk nasjonale og felleskommunale løysingar er det behov for sterkare regional samordning, kompetansedeling og erfaringsutveksling mellom kommunane.

Forslag til ny modell

Arbeidsgruppa som har utgreidd saka foreslår ein overordna modell der KDU får rolla som styringsgruppe for det regionale digitaliseringssamarbeidet i Vestland. Modellen skal leggje til rette for strategisk styring, regional koordinering og tettare samspel mellom kommunar, IKT-samarbeid og nasjonale digitaliseringsinitiativ.

Som ein del av modellen blir det foreslått å etablere eit regionalt digitaliseringsråd som skal vere den sentrale arenaen for fagleg samordning, rådgiving og erfaringsdeling. I tillegg blir det foreslått eit regionalt kontaktpunkt mot nasjonale aktørar og samstyringsarenaer, støtta av ein administrativ og fagleg støttefunksjon.

Neste steg: Konkretisere modellen

Sjølv om KDU har vedteke dei overordna prinsippa for eit nytt samarbeid, står fleire viktige avklaringar att. Mellom anna vidare arbeid med å konkretisere mandat og samansetjing for digitaliseringsrådet, rollefordeling mellom aktørane, organisering av støttefunksjonar og framtidig finansiering av samarbeidet.

Det er foreslått å gjennomføre eit digitalt informasjonsmøte for alle kommunane i Vestland når arbeidet er kome lenger, slik at kommunane kan få innsyn i modellen og kome med innspel til den vidare utviklinga.

Målet er at det seinare i haust eller til vinteren skal leggjast fram ei ny sak for KDU med forslag til endeleg organisering, mandat, finansiering og gjennomføring av det regionale digitaliseringssamarbeidet.

DigiVestland skal vere med vidare

I saksframlegget blir det understreka at ressursane i DigiVestland skal inkluderast og ivaretakast i det vidare arbeidet. Kva det betyr i praksis må avklarast i det vidare arbeidet.