DigiVestland gjennomfører nasjonal kartlegging av støttekontaktordninga

 Bakgrunn for kartlegginga

Kvam herad melde inn eit behov i DigiVestland om å sjå nærare på digital støtte på støttekontaktområdet, særleg knytt til saksbehandlingssystem, behovserklæringar og løysingar for timelister og registrering av utførte oppdrag. Innspelet fekk brei støtte frå kommunar i samarbeidet.

Mange kommunar opplever at det manglar ei heilskapleg oversikt over dagens praksis, arbeidsprosessar og systemstøtte på området. Samstundes er det uklårt kva digitale løysingar som blir nytta, kva utfordringar kommunane står overfor, og kvar det kan vere potensial for samarbeid om forbetringar.

For å få eit best mogleg kunnskapsgrunnlag har DigiVestland valt å løfte kartlegginga utover Vestland. Dei regionale digitaliseringsnettverka har derfor delt undersøkinga med kommunar over heile landet. På denne måten kan vi etablere eit breiare og meir representativt situasjonsbilete av korleis støttekontaktordninga blir organisert og støtta digitalt i norske kommunar.

Så langt har vi ikkje identifisert tydelege pågåande nasjonale initiativ på området. Ei felles kartlegging kan derfor bidra til å avklare omfang, modenheit, variasjonar i praksis og moglege synergiar før det blir vurdert vidare tiltak.

Kva kartlegg vi?

Formålet med kartlegginga er å få betre innsikt i dagens praksis, identifisere utfordringar og behov, samt avdekkje moglegheiter for vidare forbetring og digitalisering.

Undersøkinga rettar seg mot personar som har ansvar for, eller god kjennskap til, støttekontaktordninga i kommunen. Skjemaet kan fyllast ut av alle tenester som leverer støttekontakt som teneste, både der støttekontakt er ei lovpålagd teneste og der ordninga blir tilbydd på anna grunnlag. Dette kan mellom anna omfatte helse- og omsorgstenester, sosial- og velferdstenester, inkludert psykisk helse og rus, barnevernstenester, tenester til personar med funksjonsnedsetjing og andre kommunale tenesteområde som tilbyr støttekontakt.

Gjennom kartlegginga ønskjer vi å få innsikt i korleis støttekontaktordninga blir organisert og administrert, korleis oppfølging av brukarar og støttekontaktar blir gjennomført, kva digitale system og verktøy som blir nytta, opplevde utfordringar og forbetringsmoglegheiter, samt interesse for felles utviklings- og digitaliseringstiltak.

Skjemaet omfattar heile løpet knytt til både det å få støttekontakt og det å vere støttekontakt. Vi spør mellom anna om korleis søknader blir handterte, korleis saksbehandlinga er organisert, korleis brukarane blir følgde opp, og kva digitale løysingar som støttar desse prosessane. Vi ønskjer òg innsikt i korleis kommunane rekrutterer, godkjenner og følgjer opp støttekontaktar, om dei nyttar ressursbankar eller løysingar for matching, og korleis ulike system samhandlar gjennom integrasjonar.

Kartlegginga skal gi eit betre bilete av korleis kommunane arbeider i dag, kva utfordringar dei møter, og kor det kan vere grunnlag for felles utvikling og digitalisering.

Vi treng fleire svar!

Den opphavlege svarfristen var 4. september, men fristen er no utvida til 11. september.

Det tek om lag 15 til 20 minutt å svare på undersøkinga. Vi oppmodar alle kommunar til å delta slik at vi får eit mest mogleg representativt bilete av situasjonen i dag.

Resultata vil bli oppsummerte og delte med dei regionale digitaliseringsnettverka og kommunane.

Vidare arbeid

Når kartlegginga er avslutta, vil svara bli analyserte og oppsummerte. Resultata skal gi grunnlag for vidare vegval og vurderingar av moglege tiltak.

Kartlegginga vil mellom anna bidra til å avklare om det finst eit tilstrekkeleg felles behov for utviklingsarbeid, om det bør etablerast felles initiativ på tvers av kommunane, og om området bør løftast inn i den kommunale samstyringsstrukturen.

Eit viktig spørsmål er også om det kan vere grunnlag for å etablere eit nasjonalt samarbeid om digitalisering av støttekontaktordninga.

Spørsmål?

Ta gjerne kontakt med simen.soltvedt@bergen.kommune.no.