Klarare roller skal gjere digitaliseringa enklare for kommunane

Mange opplever i dag at digitaliseringsarbeidet i offentleg sektor er krevjande å orientere seg i. Det finst mange aktørar, fleire samarbeidsnivå og ulike forventningar. Kven har ansvar for kva? Kvar bør oppgåver løysast – lokalt, regionalt eller nasjonalt? Dette er spørsmål KS no tek tak i.

Bakgrunnen for arbeidet er klare tilbakemeldingar frå kommunar og fylkeskommunar som ønskjer meir felles retning og betre oversikt. Samstundes har det skjedd mykje dei siste åra: fleire interkommunale samarbeid, sterkare regionale digitaliseringsnettverk og ei større rolle for KS Digital. Alt dette gjer behovet for felles forståing endå større.

Arbeidet skal gi eit heilskapleg bilete av digitaliseringsoppgåvene i kommunesektoren og vise korleis ansvar kan fordelast på ein meir oversiktleg måte. I staden for å ta utgangspunkt i kven som gjer kva i dag, ser ein på kva oppgåver som må løysast – og kor det er mest formålstenleg å gjere dei.

Dette handlar mellom anna om:

• samarbeid om felles løysingar
• samspel mellom kommunar, regionar, KS, KS Digital og statlege aktørar
• korleis ein kan dele kompetanse, erfaringar og ressursar betre

Resultatet skal ikkje vere ei oppskrift på korleis kvar kommune må organisere seg. Tvert imot skal det vere eit praktisk og fleksibelt utgangspunkt som kan brukast lokalt, tilpassa eigne behov og føresetnader.

Arbeidet blir gjort i dialog med kommunar og fylkeskommunar, og byggjer på erfaringar som allereie finst i sektoren. Målet er å skape meir tryggleik, mindre dobbeltarbeid og betre samhandling – slik at digitalisering faktisk kan støtte tenesteutvikling og omstilling der det trengst mest.

Eit samla forslag skal vere klart sommaren 2026 og vil bli teke vidare til diskusjon i ulike nettverk og møteplassar i kommunesektoren.

Har du innspel til korleis det kan bli lettare og meir oversiktleg? Gi en lyd, så skal vi videreformidle! (Kontaktinformasjon nedst på sida)