Pilotering av regional rettleiarteneste for personvern og informasjonstryggleik i skulen

Pilotering av regional rettleiarteneste

KS initierte våren 2020 forprosjektet SkoleSec med føremål å styrke arbeidet med personvern og informasjonstryggleik knytt til det digitale læringsmiljøet til elevar. På kort sikt er målet å stille verktøy og ressursar til disposisjon slik at kommunane kan gjennomgå og trygge dei læringsressursane og samhandlingsløysingar som i dag blir mest brukt. På lengre sikt skal SkoleSec bidra til at vi får ein meir samordna sektor i samspel med andre sentrale ressursmiljø og leverandørmarknaden.

Udir har tildelt midlar til SkoleSec for pilotering av ei regional rettleiarteneste. Digi Vestland Oppvekst si arbeidsgruppe for personvern og informasjonstryggleik vart spurd av KS om å delta i dette. Piloten skal teste ut og innhente erfaringar med ei regional rettleiarteneste for skoleeigarar knytt til innkjøp, bruk og avslutning av digitale læringsressursar.

Målgruppa for piloten er skuleeigarar og rådgivarar som arbeider med dette området i kommunen sin.

Arbeidsgruppa i Digi Vestland Oppvekst vil fungere som eit rettleiarteam for kommunar i regionen som ønsker å delta i piloten. I tillegg vil ein ekspertressurs frå SkoleSec bidra inn som mentor i rettleiarteamet.