Ullensvang – kommunen som tør å gå føre

Ullensvang kommune har gjort digitalisering til eit lagarbeid. «Vi ventar ikkje på ferdigtråkka råser, men går opp vegen sjølve», seier IT-leiar Øystein Undem. Det er ei haldning som har gitt resultat, og kommunen har bygd opp ein kultur der det er lov å feile, endre kurs og lære undervegs. Denne tryggleiken har gjort Ullensvang til ein kommune som stadig er tidleg ute med nye digitale løysingar, både lokalt og nasjonalt.

Frå pilot til nasjonal premissleverandør innan oppvekst

Ullensvang sitt digitaliseringsarbeid i oppvekst starta for alvor i 2021 då kommunen blei pilotkommune i den regionale Veiledertjenesten for personvern og informasjonssikkerhet, i regi av DigiVestland og KS Skolesec. Erfaringane herfra var med på å forme metodikken som i dag blir brukt i diginettverk over heile landet.

Gjennom deltaking i eit pilotprosjekt i regi av KS Skolesec i 2023 etablerte kommunen ei eiga merkantil faggruppe og fekk på nytt ei pilotrolle – denne gongen for å utvikle nasjonale ressursar saman med Kvinnherad og Hardanger og Voss kompetanseregion. I åra som følgde deltok Ullensvang både som testkommune for den nasjonale behandlingsprotokollen og for DPIA‑utkastet for Google Workspace for Education.

I 2025 gjennomførte dei seks veiledningsrundar for å ferdigstille den nasjonale DPIA-en lokalt – ei praktisk øving som gav verdifulle erfaringar med 80/20-modellen. Då dei nasjonale støttetjenestene blei etablerte 1. januar 2026, blei draumen oppfylt for Ullensvang: endeleg er 80/20-modellen forankra nasjonalt, og arbeidet med personvern, informasjontryggleik og universell utforming i skolen blir løfta i fellesskap.

Ein viktig motor i nasjonal e-helseutvikling

Ullensvang har også markert seg tydeleg som ein viktig aktør i digitaliseringen av helse- og omsorgstenestene. Saman med KS e-helse leier kommunen det nasjonale prosjektet «Pasientens journaldokumenter – kommunen som kilde», som skal sikre trygg og strukturert deling av journaldokument. Arbeidet er ein del av Norsk helsenett si nasjonale satsing og blir støtta av Helsedirektoratet.

I tillegg deltar Ullensvang i utvikling og utprøving av KI-støtta tale-til-tekst i samarbeid med Bergen, Askøy og Voss. Kommunen er òg prosjekteigar for nasjonal erfaringsdeling i innføringa av Sentral forskrivningsmodul (SFM). Gjennom eit eige prosjekt finansiert av Digitaliseringsdirektoratet utviklar Ullensvang dessutan nye måtar å gi innbyggarar og pårørande betre opplæring i bruk av velferdsteknologi og Mitt Aidn. Kommunen er også pilot for KS Hjelpemiddel, som skal bidra til meir effektiv og digital forvaltning av hjelpemiddel.

Arbeidet viser eit breitt og solid engasjement for digital utvikling, og erfaringane frå Ullensvang kjem både regionen og resten av landet til nytte.

Digital transformasjon: Ny kunnskap, større tryggleik og betre gjennomføringsevne

Den digitale transformasjonen i Ullensvang har utfordra organisasjonen, særleg når det kjem til gevinstrealisering. Samtidig har prosessen gitt både leiargruppa og dei hovudtillitsvalde ny innsikt og motivasjon. Arbeidet har gitt heile organisasjonen større merksemd på digital modenheit – ikkje berre i eitt fagområde, men på tvers av kommunen.

Eit viktig utbytte har også vore tettare dialog og betre lagbygging internt og mellom kommunane i regionen. Deltakarane frå Ullensvang trekkjer spesielt fram kor verdifullt dette kompetansetiltaket var, både fagleg og organisatorisk.

Effektive prosjekt, korte beslutningsvegar og sterk fagkompetanse

Ullensvang har dei siste åra jobba målretta med å styrke gjennomføringsevna. Kommunen har i dag eit solid fagmiljø med brei kompetanse innan både PRINCE2 og LEAN prosessleiing. Dette bidreg til mindre byråkrati og meir effektive prosjektløp.

Toppleiinga er tett på, engasjert og godt oppdatert – noko som gir raske avgjerder og god forankring gjennom heile organisasjonen.

Kommunen har også ein representant i Digitaliseringsdirektoratet sitt arkitektur- og standardiseringsråd, noko som gir dei ei viktig stemme i utviklinga av nasjonale prinsipp for digital samhandling i offentleg sektor.

Ullensvang viser vegen vidare

Ullensvang viser at storleik ikkje er avgjerande for å vere ein viktig innovatør i kommunesektoren. Det handlar om kultur, samarbeid, nysgjerrigheit og ei leiing som tør å satse.

Det gjer dei til eit inspirerande døme for alle i DigiVestland.