Samarbeid og samstyring på oppvekstområdet

Framside / Portefølje/ Faggrupper / Fagnettverk for oppvekst / Aktuelt / Samarbeid og samstyring på oppvekstområdet

Fag- og prioriteringsutvalet for oppvekst

Fag- og prioriteringsutvalet for oppvekst er ein del av samstyringsstrukturen til KS for digitaliseringsarbeid i kommunal sektor. Utvalet skal samordne og framme kommunale interesser og behov gjennom å gi innspel og råd til nasjonale digitaliseringstiltak og til prioritering av nasjonale innsatsar og digitalisering av tenester på oppvekstområdet. Digi Vestland er representert i fag- og prioriteringsutvalet ved Are Andreassen, seksjonsleiar Seksjon for digitalisering og verksemdsstyring i Bergen kommune.

Nasjonalt samstyringsråd for digitalisering i grunnopplæringa

Nasjonalt samstyringsråd for digitalisering i grunnopplæringa mellom KS og staten skal ta opp tverrgåande problemstillingar på eit strategisk nivå knytt til økosystemet for digitale læringsmiddel. Samstyringsrådet består av Kunnskapsdepartementet, Utdanningsdirektoratet, SIKT, Statped og KS. Avgjerder i samstyringsrådet blir forankra i verksemdene og bidrar til samhandling og koordinering mot felles uttalte mål. Dette skal bidra til felles retning i digitaliseringa av grunnopplæringa. Digi Vestland er representert i samstyringsrådet ved Marius Arnason Bøe, kommunaldirektør for barnehage, skule og idrett i Bergen kommune.

Samarbeid om ny digitaliseringsstrategi

Den nåverande digitaliseringsstrategien for grunnopplæringa Framtid, fornying og digitalisering (2017-2021) har grunna pandemien vorte utvida til å òg gjelde 2022. Det utarbeidast no ein ny strategi for digital kompetanse og infrastruktur i barnehage, grunnskule og vidaregåande opplæring. Strategiperioden er 2023-2030, og blir forventa følgt opp med handlingsplanar. Strategien blir utvikla i eit samarbeid mellom Kunnskapsdepartementet og KS, og skal bygge på eksisterande strategi og handlingsplan. Barnehage og fag- og yrkesopplæringa skal inkluderast i strategien.

Digi Vestland har ved Fagnettverk for oppvekst gitt og presentert samla innspel til ny digitaliseringsstrategi via fag- og prioriteringsutvalet for oppvekst. Innspela er henta frå fleire aktørar i digitaliseringsnettverket, og er forankra i fagnettverkets styringsgruppe. I innspela til ny digitaliseringsstrategi har Digi Vestland vektlagt følgjande:

• Dei digitale evnene til elevane og læraranes profesjonsfaglege digitale kompetanse

• Læremidlar (økosystemet, kvalitet og tilgang)

• Fellesløysingar

• Personvern (barn, unge og tilsette)

• Informasjonstryggleik (skule- og barnehageeigarar)

• Pedagogiske strategiar, læringsutbytte og organisatorisk utvikling

• Pedagogisk utvikling i faga i lys av fagfornyelsen

• Teknologisk utvikling som kunstig intelligens og læringsanalyse

Digi Vestland ved fagnettverket vil følgje og vere involvert i den vidare prosessen med ny digitaliseringsstrategi utover hausten.